حدوتة من كتاب " المرأة والحدوتة "

سهراية
"الست زراره وجوزها" *

وحّد الله… كان فيه واحده اسمها زراره وواخدها واحد، وطبعًا كان كل يوم الصبح يبدَّر يروح الغيط يشتغل، وهىَّ كانت تاخد آه… لامؤاخذه كده الجاموسه تجُرَّها، وتاخد آه… الفطور وتمشى له، فجات آه، مرَّه من المرات واحد عرفها إنها عبيطه شوى فجه قَلَّها آه… يا ست انت اسمك آه؟… قلت له: اسمى زراره، قَلَّها ع الجمال ده كله وع الحلاوه دى كلها واسمك زراره؟!! طب ماورا بيتك سوق يتباع فيه الأسوم… خدى الجاموسه ديدى بيعيها واشترى لك اسم قَلِت له: والله… قال ليها والله، جات واخده الجاموسه، كان هُوَّ لف من تانى ناحيه وراح مقابلها وقَلَّها يا ست انت رايحه فاه؟ قلت له: آنى رايحه ابيع الجاموسه واشترى اسم، قَلَّها طب مانى اللى باشترى وانا اللى بابيع الأسوم قَلِت له: ماشى، قَلَّها الجاموسه دى باسم، يبقى بدل مااسمك زراره بقى اسمك الست فطوّمه، ومن عندى آنى الست " هنومه " ماشى يا ست قَلِت له: ماشى
وجات عاطياله الجاموسه وراحت غاسله ولابسه وجات قافله على نفسها الباب وجات قاعده فدكهو استعوقها([1])، قَلَّها: يا زراره افتحى الباب، قَلِت له: خليك بـرّه لما تجي لـك زراره تبقى تفتح لـك، يا زراره افتحى الباب ماسألتش فيه… يا سخامة الطين افتحى الباب، فهىّ تحسبه بيقول ليها يا ست فطومه جات قايمه وفتحت له الباب، قَلَّها آه ماجيتيش الغيط لاه؟ قَلِت له: اسكت يا خويا مش فى واحد فات من هنا بتاع أسوم بعت له الجاموسه واشتريت منه اسم " الست فطومه "، وقَلِّى مـن عندى آنى الست هنومه، قَلَّها، فآنى كـده بعت الجاموسه…
قال والله آنى سايبهالك يا ست هنومه، إن لقيت أعبط منك هعاودلك، وان لقيت أنصح منك مش هعاود، فلم هدمتينه([2]) وخد بعضيه وجه ماشى، فراح ماشى تحت سرايه بتاعة الوزير وراح قاعد، فالخدامه تلقّح الذباله فيها لقم وهوَّ ينقِّى اللقم من تحتيها وياكل… جعان طبعًا وياكل، فالخدامه بصِّت وقالت لمراة الوزير، يا ستى فيه واحد قاعد تحت السرايه قاعد قَلِت له: إندهى له، قَلِت له: يا عم انت مناه قَلَّها أنا من حنهم الحمرا، قَلِت له: بس يبقى انت من عند عيالى، قَلِت له:: طب ماشفتش عيالى قَلَّها شفتهم، قَلِت له: طب عاملين آه؟ قَلَّها والله عيشتهم لا تسر ولا ترضى ربنا، الناس فيها يلبسوا حلو، وياكلوا حلو ويشربوا حلو، ودوله يا نارى هدومهم مبلله وجعانيين ودايرين آه… يصعبوا ع الكافر فراحت آه… جايباله آه… فطير وحاجات حلوه وفواكه، وجات محمَّلاه وراحت مشيَّلاه، وصارَّاله صُرَّه بالهدوم والأكل الحلو، وقلت له: خد، ودى للعيال ياكلوا ويلبسوا ويشربوا حلو، هُوَّ خد الصُّرَّه، ونـزل، آه،
وصاحب بيتها جه معاه فرسه راح رابطها تحت، وراح طالع لها، قَلِت له: اسكت مش جه واحد هنا من جهنم الحمرا من عند عيالك، وقال دا عيشتهم سودا وهدومهم مقطَّعه وعطيته هـدوم وعطيته فطير، وعطيت وعطيت، فطبعـًا آه… خد بعضيه وطلع يجرى ورا الراجل علشان يجيب منه الصُّره، فدكهو بص وراه لقى الفرسه بتعفَّر وراه، لقى واحد أقرع بيحرت، فقَلُّه: انت شايف يا عم ياللى بتحرت قَلُّه: شايف الراجل بتاع الفرسه اللى بيعفَّر قَلُّه: أيوه… قَلُّه: بيقطَّع روس القرع، فهات أحرت عنك، وانت اركب فوق السجره، عطاه المحرات، واللقرع جه راكب فوق السجره، فجه الراجل نهون… اللى راكب الفرسه، يا عم ياللى بتحرت قَلُّه شفتش واحد من هنا معدى من هنا شايل صرّه وعدى من هنا؟ قَلُّه: راكب فوق السجره، قَلُّه يا عم انزل جاى، قَلُّه: والله مافيه إلا حبايه واحده، طب أعمل بها آه الحبايه، انزل لى جى يقَلُّه والله حتِّة قرعايه صغيره، يا عم انزل انزل، كان صاحبك دكهو آه كان خد الصره وخد الجوز بهايم وركب الفرسه وراح ماشى، فدكهو قَلُّه انزلِّى جى، فراح نازل وقَلُّه مافيش إلا حبايه واحده، قَلُّه: مش انت اللى واخد الصره من الوليه؟ قال: اللى واخد الصُّرَّه هُوَّ اللى بيحرت فخدوا بعضيهم هُمَّ اللِّتنين وراحو لا لقوا البهايم ولا لقوا الصُّرَّه ولا لقوا الفرسه… فطبعًا راح معاود على مرته قَلِت له: أمّال فاه الفرسه؟ قَلَّها: أنا مشيت جهنم الحمرا لقيت صحيح عيالك هدومهم مقطعه وجعانين، والناس كلها تلهد ع اللفرس، وهُمَّ مـش لاقيين حـاجـه فرحـت عاطيهم آه… الفرس يلهدوا عليها زى الناس،
صاحبنا دكهو اللى هُوَّ صاحب زراره، قَلَّها يا ست هنومه قَلِت له: أيوه قَلَّها: خدى احلبى، وخُضِّى وكلى سمن واغسلى وكلى حلو واشربى حلو ياما فيه ف الدنيا أعبط منك .
وحدوتة ملتوته خلصت الحدوتة.
...........
* المؤدي: امتنعت عـن ذكر أسمها ـ وقـد رمز لها الباحث بالرمز(غ) ـ سبق التعريـف بها ـ تم التسجيل معها فى ديسمبر 2000، والعنوان من اقتراح الباحث.
([1]) فدكهو استعوقها: شعر زوجها بأنها تأخرت عليه.
([1]) لم هدمتينه: قام بجمع ملابسه

...

الصورة المرفقة من أعمال ماعت